Në gusht të vitit 2017, pikërisht në ditën kur do të nisesha me kolegun tim amerikan për një tjetër ekspeditë kërkimore në Greqi, ndaluam në Muzeun e Fshatarit Rumun për t’i treguar fotografitë origjinale të realizuara nga vëllezërit Manakia. Pikërisht, atëherë, kuptuam se shumë prej imazheve nuk kishin vendndodhje të saktësuar në katalogët e muzeut.
Papritur, vendosëm të ndryshonim itinerarin tonë. Dy ditë më vonë ndodheshim në Republikën e Maqedonisë së Veriut.
Fotografia e Kruševos – Crușuva në vllahisht ishte lehtësisht e njohshme dhe e datuar: 15 gusht 1903. Na mbetej vetëm të identifikonim vendin e saktë nga ku ishte realizuar.
Më 2 gusht 1903, në Ditën e Shën Ilias, banorët e Kruševos u ngritën kundër osmanëve dhe vëllezërit Manakia mbërritën pak kohë pas shkatërrimit të qytetit për ta dokumentuar atë.
Me fotografinë në dorë, u nisëm nëpër Kruševo për të gjetur vendin. E gjetëm shpejt, por pozicioni dukej i përafërt. Këndvështrimi ishte ose shumë i ulët, ose shumë i lartë krahasuar me fotografinë e vjetër. Shpejt kuptuam se në atë vend, tashmë qëndronte një shtëpi. Një shekull histori ndryshon shumë gjëra.
Momenti i vërtetë i befasisë erdhi më vonë, kur kuptova se, pa e planifikuar, e kisha bërë fotografinë saktësisht 114 vjet pas vëllezërve Manakia.
Në vitin 1903, Perandoria Osmane përdorte ende kalendarin Julian. Kur llogarita diferencën prej 13 ditësh, përputhja u bë e qartë, një koincidencë thellësisht simbolike për fotografinë time të parë të rikrijuar, duke ndjekur gjurmët e vëllezërve Manakia.
